កំពង់ចាម៖ ស្នងការដ្ឋាននគរបាលខេត្តកំពង់ចាម លោក ជា ធារិទ្ធ បានសុំទោសជាសាធារណៈចំពោះកំហុសរបស់ខ្លួនដែលចូលក្នុងព្រះវិហារមួយកន្លែងដោយមិនដោះស្បែកជើង ដែលធ្វើឱ្យប៉ះពាល់ទំនៀមទម្លាប់ព្រះពុទ្ធសាសនាជាទីគោរពសក្ការៈ។

លោក ជា ធារិទ្ធ បានមកដល់ព្រះវិហារ និងបានសំពះសូមខមាទោសជាសារធាណៈចំពោះព្រះសង្ឃគ្រប់អង្គ ថ្នាក់ដឹកនាំគ្រប់លំបាប់ថ្នាក់ និងសាធារណជនទាំងអស់ ចំពោះកំហុសឆ្គងដែលបានប្រព្រឹត្តខុសសីលធម៌ដោយប្រញ៉ាប់ប្រញាល់ និងភ្លេចខ្លួនក្នុងអំឡុងចុះត្រួតពិនិត្យសម្រាប់ត្រៀមរៀបចំពិធីបុណ្យឆ្លងសមិទ្ធផលនានារបស់វត្តកាលពីថ្ងៃទី១៤ ខែមីនា ឆ្នាំ២០២៤។

ការសុំទោសរបស់លោក ជា ធារិទ្ធ ធ្វើឡើងក្រោយមានការប្រតិកម្មពីសាធារណជន ជាពិសេសពីប្រធានក្រុមប្រឹក្សាព្រះមហាក្សត្រ សម្តេចតេជោ ហ៊ុន សែន កាលពីថ្ងៃទី១៧ ខែមីនា ឆ្នាំ២០២៤។

លោក ជា ធារិទ្ធ បានសន្យាថា នឹងមិនឱ្យកើតមានកំហុសឆ្គងនេះបន្ដទៀតឡើយ ហើយនឹងប្រតិបត្តិទៅតាមធម៌វិន័យគន្លងព្រះពុទ្ធសាសនាឱ្យបានល្អ៕